هیله اکاډمي چې د زرغون انلاین ښوونو دیپارټمنټ دی، په پام کې لري چې په هېواد کې د ساینس‌ فرهنګ د ترویج لپاره هر کال د استاد غلام‌سخي رسولي په نامه، د ساینسي مضامینو غوره ښوونکي ته جایزه ورکړي. استاد غلام‌سخي رسولي د ساینسي علومو ښوونکی و چې تر نوي کلنۍ پورې یې ساینسي علوم تدریسول. نوموړي ان په خپل کور کې د انجونو د زده‌کړو وړیا مرکز جوړ کړی و، چې په مرسته یې د وردګو ولایت، د چک ولسوالۍ د لالاخېلو کلي ډېرو انجونو لیک لوست زده کړل. زموږ په وطن کې 65 کلني د تقاعد سن دی، اما استاد رسولي له تقاعد وروسته تقریباً دېرش کاله داوطلبانه ساینسي علوم تدریس کړل. زرغون هیله لري چې د افغانستان ټول ښوونکي دې، د ارواښاد استاد رسولي په څېر ښوونې او روزنې ته ځان وقف کړي.